kaise bhulaoon?

tumhe yaad hoga ke nahin
tanha lamhon mein ye khayaal saath deta hai
vo pehle sparsh ka ehsaas
mujhe abhi bhi yaad hai
kaise bhulaoon batla do.

kya tumhe yaad hai
humne nainon ki bhaasha seekhi thi
chupke se tumne apni preet jataai thi
vo lamha ab sapnon mein dekhti hoon
kaise bhulaoon batla do.

yaad hain vo pal?
meri zulfon mein ungliyaan pherna tumhara
vo har waqt mujhe sarhaana
apne hoton ki baansuri banaana
kaise bhulaoon batla do.

itne paas the
saans leti thi to tumhari khushboo aati thi
ab vo aalam hai ki gayaa waqt sapna sa lagta hai
poochh sakti hoon kya mera naam yaad hai tumhe?
par mein tumhe kaise bhulaoon, zaraa batla do.

- Manisha